Genoeg water is nie net goed vir jou vel en lyf nie, ons het ook genoeg vloeistof nodig om te oorleef. En wanneer jy gedehidreer (ontwater) is, voel jy werklik sleg. Maar om te min water te drink is dalk nie die enigste rede vir dehidrasie nie …

Wanneer jy sleg voel ná ’n lang dag in die son of sommer omdat jy weet jy het nie vandag genoeg water gedrink nie, is dit maklik om die slegvoel aan dehidrasie toe te skryf. Jy drink weer ’n paar glase meer, slaap vir ’n uur of twee, en als lyk weer beter.

Maar volgens Health.com is daar baie meer redes vir dehidrasie as wat ons dalk gedink het. Lees die volle storie hier.

Dáái tyd van die maand

Maak seker dat jy elke dag een ekstra glas water drink. Estrogeen en progesteroon beïnvloed jou lyf se hidrasievlakke en wanneer dié twee wipplank speel, moet jy meer water drink om gehidreer te bly.

Lae-koolhidraat-dieet

Omdat sommige koolhidrate (soos rys en pasta) water opsuig terwyl dit kook, beteken dit dat jou liggaam daardie water inneem wanneer jy dit eet. Dít is hoekom jy altyd ’n paar kilogram watergewig verloor wanneer jy koolhidrate uitsny. Dit lyk dalk goed op die skaal, maar dit is beslis slegte nuus vir jou hidrasievlakke. Neem dus meer vloeistowwe in op dié dieet.

Stres

Wanneer jy onder druk is, stel jou adrenalienklier streshormone vry. Indien jy gereeld onder druk is, raak hierdie klier uitgeput en dit veroorsaak ’n adrenalien-tekort. Dieselfde klier vervaardig ook aldosteroon, ’n hormoon wat jou liggaam se vloeistowwe en elektroliete reguleer. Hoe groter die tekort aan adrenalien is, hoe minder aldosteroon produseer jou lyf en dit veroorsaak dehidrasie en lae vlakke van elektroliete.

Die oplossing: Drink meer water wanneer jy stres.

Ken die simptome

Dalk voel jy reeds ’n paar dae lank sleg, maar jy kan nie verstaan wat die oorsaak is nie. Miskien is jy gedihidreer. Volgens Medical News Today is die simptome van dehidrasie:

• Droë mond
• Lusteloosheid
• Min of geen trane wanneer jy huil
• Kopseer
• Duiseligheid

5 maniere om maklik genoeg water te drink

1. Kry ’n water-maatjie

Span met iemand by die werk saam en herinner mekaar elke uur om ’n glas water te drink. Die bietjie rondloop sal jou ook goed doen.

2. Kikker jou water op

Maak ysblokkies uit suiwer vrugtesap en voeg dit by jou water, of sny ’n suurlemoen, lemoen, komkommer of pynappel op en voeg dit by. ’n Paar pepermentblare sal ook die wêreld se verskil maak.

3. Geur jou water

Plaas 1½ framboos, in kwarte gesny en effens fyngedruk, saam met ’n ¼ koppie pepermentblare in ’n waterbeker. Maak die beker vol met gewone mineraalwater. Voeg ys by as jy wil.

4. Maak dit warm

Rooibos- en ander kafeïenvrye tee laat jou water drink sonder dat jy voel jy drink water. Let wel, groentee en gewone tee bevat albei kafeïen. Drink dit sonder melk of suiker as jy kan.

5. Slaap met ’n lang glas langs jou bed

Dit is nie ideaal vir jou slaappatroon om baie water te drink nét voordat jy gaan slaap nie, maar dis altyd ’n goeie idee om water langs jou bed te hê vir wanneer jy in die nag dors wakker skrik en die kraan net te ver is.

Bronne: Health.com, Medical News Today

Nóg gesondheidstories

• 5 redes hoekom jy heeltyd moeg is – en hul oplossings – DEEL 1
• 5 redes hoekom jy heeltyd moeg is – en hul oplossings – DEEL 2
• Watter oefening is die beste vir jou? Kyk hier wat die bekendes doen
• Die 10 vuilste plekke in jou kombuis + Só raak jy die kieme baas

The post Redes waarom jy gedehidreer is PLUS wenke om meer water te drink appeared first on SARIE.